Ranglong Baibul Rachi
By - Late Rev. Simlalchuang
Ranglong Kristian nei hong chang len ata Baibul anlet rang hi nei put ani na. Atun kristian nei hong changna kum 50 nei hong suak rang ani zei. Tenchu Pathian chong na nunna athul thei, na
ratha bul Baibul hi na chonga la don mak me. 1960 kuma “Marka isui Khoborssa” Chorei chonga Bible Society of India & Ceylon ngai published athona. Hava ha Devanagiri Bengali script a anziak ani na. Kristian achang mansa ngai in Khosak, Kor, Sap chong a Baibul ahong mang u chachaka. Tenchu hava nam atei chong lehan Pathian chong omzia anthuk ha na ton sua maka. Nam population atomte lekhathei literate atomte na ni na. Mission le Organisation atei atei ngaiin na nam ei tom le lekhathei ei tom sika hador kui na tel zet u maka. Hanum nisela boidongna don luia Pathian kom bor na zonga. Na chong anzakpui mak mena, Pathian kut suak khat ei ni sika.
Pathian in na bor zongna ana rangai pena, February, 21, 1987 kum a Bro. Gobin Singh, Bibles International co-ordinator in Bible Translation workshop ruia Pu. Ditluaring akoma lekha ahong mathuan a. Lekha na ei hong manthei chu March 30th nata April 16, 1987 a Deodars Spiritual Life Center, Mussoorie U.P a Bible Translation Workshop om inti, ati na.
Hasik han Mr. Ditluamoni, B.A. le Rev. Simlalchuang, B.Th. chu March 26. 1987, Thursday nikhua zing a bor azong chunga Mussoorie Workshop ranga asuak u na. Mussoorie chu March 29 zing 6.00 a.m a ava tung thei u na. Zingkhuavar March 30 Monday nata chu workshop an phut lena. N.T Bible a lekha bu anlet mansa chu Jakob lekhabu ani.
1990 kum ata chief translator Rev. Simlalchuang chu Bible International ngaiin atha tina (partly) financial support ahong tho u na. Asik chu Rev. Simlalchuang hi Association ruiril anga full time Bible anleta sin atho ranga depute antho ani na. Baibul anlet sin bibila Ranglong nunai Baibul le la bu ei en theina ranga Ranglong Literacy work um ana phutpui len u na. Hasik ha March 1992 kuma “Ranglong Horop Anchuna” primer book released ana tho pe len u. Hatuka chu New Testament Baibul na man mana arapa ranga “Johan ei maziak Thang Ahui” 1994 kuma published ana tho pe ret u. Adiktaka chu Ranglong New Testament project hi Bibles International in kum 10 target ei nei ani na. Tenchu translator pu taksa natna le vanduaina sika le Committee ei rat nok sika atun keng, 2 February 2003 kuma Baibul nei la man. Pathian in ahun le zoro ei ti anga Bible International ngai sanna zara Ranglong nam in Baibul na hong man zei, Puma chu anpaka om rase.
